ਵਿਦੇਸ਼ ਰਾਜ ਮੰਤਰੀ ਪਬਿਤ੍ਰਾ ਮਾਰਗੇਰੀਟਾ ਨੇ 28 ਮਾਰਚ ਨੂੰ ਲੋਕ ਸਭਾ ਨੂੰ ਦੱਸਿਆ ਕਿ 35.4 ਮਿਲੀਅਨ ਲੋਕਾਂ ਦੇ ਨਾਲ ਭਾਰਤ ਦਾ ਡਾਇਸਪੋਰਾ ਦੁਨੀਆ ਦਾ ਸਭ ਤੋਂ ਵੱਡਾ ਡਾਇਸਪੋਰਾ ਹੈ ਅਤੇ ਇਹ ਮੁੱਖ ਖੇਤਰਾਂ ਨਾਲ ਆਰਥਿਕ ਅਤੇ ਸੱਭਿਆਚਾਰਕ ਸਬੰਧਾਂ ਨੂੰ ਮਜ਼ਬੂਤ ਕਰਨ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦਾ ਹੈ।

 

ਖੇਤਰੀ ਰਣਨੀਤਕ ਸਹਿਯੋਗ ਬਾਰੇ ਇੱਕ ਸਵਾਲ ਦੇ ਜਵਾਬ ਵਿੱਚ ਮਾਰਗੇਰੀਟਾ ਨੇ ਖਾੜੀ, ਮੱਧ ਪੂਰਬ ਅਤੇ ਉੱਤਰੀ ਅਫਰੀਕਾ ਖੇਤਰਾਂ ਵਿੱਚ ਕੂਟਨੀਤਕ ਅਤੇ ਆਰਥਿਕ ਸਬੰਧਾਂ ਨੂੰ ਡੂੰਘਾ ਕਰਨ ਲਈ ਸਰਕਾਰ ਦੀਆਂ ਪਹਿਲਕਦਮੀਆਂ ਨੂੰ ਉਜਾਗਰ ਕੀਤਾ। ਉਨ੍ਹਾਂ ਇਹਨਾਂ ਯਤਨਾਂ ਵਿੱਚ ਇੱਕ ਪੁਲ ਵਜੋਂ ਡਾਇਸਪੋਰਾ ਦੀ ਭੂਮਿਕਾ 'ਤੇ ਵੀ ਜ਼ੋਰ ਦਿੱਤਾ।

 

“35.4 ਮਿਲੀਅਨ ਦਾ ਤਾਕਤਵਰ ਵਿਦੇਸ਼ੀ ਭਾਰਤੀ ਭਾਈਚਾਰਾ, ਜਿਸ ਵਿੱਚ 15.9 ਮਿਲੀਅਨ ਗੈਰ-ਨਿਵਾਸੀ ਭਾਰਤੀ ਅਤੇ 19.5 ਮਿਲੀਅਨ ਭਾਰਤੀ ਮੂਲ ਦੇ ਵਿਅਕਤੀ ਸ਼ਾਮਲ ਹਨ, ਦੇਸ਼ ਦੀ ਤਰੱਕੀ ਵਿੱਚ ਇੱਕ ਅਨਮੋਲ ਭਾਈਵਾਲ ਹੈ,” ਮਾਰਗਰੀਟਾ ਨੇ ਕਿਹਾ। ਉਨ੍ਹਾਂ ਨੇ ਵਿਦੇਸ਼ਾਂ ਵਿੱਚ ਵਸਦੇ ਭਾਰਤੀਆਂ ਦੇ ਯੋਗਦਾਨ ਨੂੰ ਰੇਮਿਟੈਂਸ, ਵਪਾਰ, ਨਿਵੇਸ਼, ਸੱਭਿਆਚਾਰਕ ਆਦਾਨ-ਪ੍ਰਦਾਨ ਅਤੇ ਮੁਹਾਰਤ ਅਤੇ ਗਿਆਨ ਦੇ ਤਬਾਦਲੇ ਵੱਜੋਂ ਪਰਿਭਾਸ਼ਿਤ ਕੀਤਾ ਅਤੇ ਉਨ੍ਹਾਂ ਨੂੰ ਭਾਰਤ ਦੇ ਵਿਸ਼ਵਵਿਆਪੀ ਹਿੱਤਾਂ ਨੂੰ ਅੱਗੇ ਵਧਾਉਣ ਵਿੱਚ ਇੱਕ ਜ਼ਰੂਰੀ ਕੜੀ ਕਿਹਾ।

 

ਮਾਰਗਰੀਟਾ ਨੇ ਭਾਰਤੀ ਪ੍ਰਵਾਸੀਆਂ ਦੀ ਪੂਰੀ ਸ਼ਕਤੀ ਨੂੰ ਵਰਤਣ ਲਈ ਸਰਕਾਰ ਦੇ ਚੱਲ ਰਹੇ ਯਤਨਾਂ 'ਤੇ ਜ਼ੋਰ ਦਿੱਤਾ। “ਇੱਕ ਸਫਲ, ਖੁਸ਼ਹਾਲ ਅਤੇ ਪ੍ਰਭਾਵਸ਼ਾਲੀ ਪ੍ਰਵਾਸੀ ਭਾਰਤੀ, ਭਾਰਤ ਲਈ ਇੱਕ ਸੰਪਤੀ ਹੈ। ਵਿਦੇਸ਼ੀ ਭਾਰਤੀਆਂ ਨਾਲ ਸਬੰਧਾਂ ਨੂੰ ਮਜ਼ਬੂਤ ਕਰਕੇ, ਦੇਸ਼ ਨੂੰ ਆਰਥਿਕ ਸਹਿਯੋਗ ਅਤੇ ਇੱਕ ਖੁਸ਼ਹਾਲ ਵਿਸ਼ਵਵਿਆਪੀ ਭਾਈਚਾਰੇ ਤੋਂ ਮਿਲਣ ਵਾਲੀ ਸ਼ਕਤੀ ਦੁਆਰਾ ਮਹੱਤਵਪੂਰਨ ਲਾਭ ਪ੍ਰਾਪਤ ਹੋਵੇਗਾ,” ਉਨ੍ਹਾਂ ਕਿਹਾ।

 

ਰਣਨੀਤਕ ਸਹਿਯੋਗ ਦਾ ਵਿਸਤਾਰ

 

ਮੰਤਰੀ ਨੇ ਖਾੜੀ, ਮੇਨਾ ਅਤੇ ਮੈਡੀਟੇਰੀਅਨ ਖੇਤਰਾਂ ਵਿੱਚ ਰਾਜਨੀਤਿਕ, ਆਰਥਿਕ ਅਤੇ ਸੁਰੱਖਿਆ ਸਬੰਧਾਂ ਨੂੰ ਮਜ਼ਬੂਤ ਕਰਨ ਦੇ ਉਦੇਸ਼ ਨਾਲ ਭਾਰਤ ਦੇ ਚੱਲ ਰਹੇ ਕੂਟਨੀਤਕ ਰੁਝੇਵਿਆਂ ਦੀ ਰੂਪ-ਰੇਖਾ ਵੀ ਦਿੱਤੀ। "ਭਾਰਤ ਨੇ ਆਰਥਿਕ ਵਿਕਾਸ, ਊਰਜਾ ਸੁਰੱਖਿਆ, ਤਕਨੀਕੀ ਨਵੀਨਤਾ ਅਤੇ ਬੁਨਿਆਦੀ ਢਾਂਚੇ ਦੇ ਵਿਕਾਸ 'ਤੇ ਧਿਆਨ ਕੇਂਦਰਿਤ ਕਰਦੇ ਹੋਏ ਕਈ ਦੇਸ਼ਾਂ ਨਾਲ ਬਹੁਪੱਖੀ ਰਣਨੀਤਕ ਭਾਈਵਾਲੀ ਸਥਾਪਤ ਕਰਨ ਲਈ ਇਸਦੇ ਕੂਟਨੀਤਕ ਯਤਨਾਂ ਦਾ ਲਾਭ ਉਠਾਇਆ ਹੈ," ਉਸਨੇ ਕਿਹਾ।

 

ਇਹਨਾਂ ਯਤਨਾਂ ਦੇ ਹਿੱਸੇ ਵਜੋਂ ਭਾਰਤ ਇਜ਼ਰਾਈਲ, ਯੂਏਈ ਅਤੇ ਯੂਐਸਏ ਨਾਲ ਇੱਕ ਸਾਂਝੇਦਾਰੀ ਰਾਂਹੀ ‘ਆਈ2ਯੂ2’ ਪਹਿਲਕਦਮੀ ਵਿੱਚ ਇੱਕ ਮੁੱਖ ਭਾਗੀਦਾਰ ਹੈ। ਇਹ ਪਹਿਲਕਦਮੀ ਪਾਣੀ, ਊਰਜਾ, ਆਵਾਜਾਈ, ਪੁਲਾੜ, ਸਿਹਤ ਅਤੇ ਭੋਜਨ ਸੁਰੱਖਿਆ ਵਿੱਚ ਸਹਿਯੋਗ ਵਧਾਉਣ 'ਤੇ ਕੇਂਦ੍ਰਿਤ ਹੈ। "ਅਜਿਹੇ ਸਹਿਯੋਗਾਂ ਰਾਹੀਂ, ਭਾਰਤ ਬੁਨਿਆਦੀ ਢਾਂਚੇ ਨੂੰ ਆਧੁਨਿਕ ਬਣਾਉਣ, ਉਦਯੋਗਾਂ ਨੂੰ ਡੀਕਾਰਬੋਨਾਈਜ਼ ਕਰਨ ਅਤੇ ਉੱਭਰ ਰਹੀਆਂ ਤਕਨਾਲੋਜੀਆਂ ਦੇ ਵਿਕਾਸ ਨੂੰ ਉਤਸ਼ਾਹਿਤ ਕਰਨ ਲਈ ਨਿੱਜੀ ਖੇਤਰ ਦੀ ਪੂੰਜੀ ਅਤੇ ਮੁਹਾਰਤ ਜੁਟਾ ਰਿਹਾ ਹੈ," ਉਸਨੇ ਅੱਗੇ ਕਿਹਾ।