ਅਮਰੀਕਾ ਜਾਣ ਵਾਲੇ ਭਾਰਤੀ ਵਿਦਿਆਰਥੀ / courtesy photo

ਅਮਰੀਕਾ ਵਿਚ ਇਸ ਸਾਲ ਮਾਰਚ ਤੋਂ ਮਈ ਦਰਮਿਆਨ ਪੜ੍ਹਨ ਵਾਲੇ ਭਾਰਤੀ ਵਿਦਿਆਰਥੀਆਂ ਨੂੰ ਜਾਰੀ ਕੀਤੇ ਗਏ ਵੀਜ਼ਿਆਂ ਦੀ ਗਿਣਤੀ ਵਿੱਚ 27 ਪ੍ਰਤੀਸ਼ਤ ਦੀ ਕਮੀ ਆਈ ਹੈ, ਜੋ ਕੋਵਿਡ-19 ਮਹਾਂਮਾਰੀ ਤੋਂ ਬਾਅਦ ਵੀਜ਼ਾ ਸੀਜ਼ਨ ਦੀ ਸਭ ਤੋਂ ਹੌਲੀ ਸ਼ੁਰੂਆਤ ਹੈ।

ਅਮਰੀਕੀ ਸਟੇਟ ਡਿਪਾਰਟਮੈਂਟ ਦੀ ਨਵੀਂ ਜਾਣਕਾਰੀ ਮੁਤਾਬਕ, ਇਸ ਦੌਰਾਨ ਕੇਵਲ 9,906 F-1 ਵੀਜ਼ੇ ਜਾਰੀ ਹੋਏ - ਜੋ ਕਿ ਪਿਛਲੇ ਸਾਲ ਦੇ ਇਨ੍ਹਾਂ ਹੀ ਮਹੀਨਿਆਂ ਵਿੱਚ ਜਾਰੀ ਹੋਏ 13,478 ਵੀਜ਼ਿਆਂ ਨਾਲੋਂ ਘੱਟ ਹਨ ਅਤੇ ਇੱਥੋਂ ਤੱਕ ਕਿ 2022 ਵਿੱਚ ਜਾਰੀ ਹੋਏ 10,894 ਵੀਜ਼ਿਆਂ ਨਾਲੋਂ ਵੀ ਘੱਟ ਹਨ, ਜਦੋਂ ਅੰਤਰਰਾਸ਼ਟਰੀ ਯਾਤਰਾ ਮੁੜ ਸ਼ੁਰੂ ਹੋਈ ਸੀ।

ਮਾਰਚ ਤੋਂ ਮਈ ਦਾ ਸਮਾਂ ਆਮ ਤੌਰ 'ਤੇ ਵੀਜ਼ਾ ਗਤੀਵਿਧੀਆਂ ਲਈ ਸਿਖਰ 'ਤੇ ਹੁੰਦਾ ਹੈ, ਕਿਉਂਕਿ ਵਿਦਿਆਰਥੀ ਅਗਸਤ ਜਾਂ ਸਤੰਬਰ ਵਿੱਚ ਸ਼ੁਰੂ ਹੋਣ ਵਾਲੇ ਫਾਲ ਸੈਮੈਸਟਰ ਦੀ ਤਿਆਰੀ ਕਰਦੇ ਹਨ। ਇਸ ਸਾਲ ਦੀ ਇਹ ਗਿਰਾਵਟ ਟਰੰਪ ਸਰਕਾਰ ਦੀਆਂ ਨਵੀਆਂ ਇਮੀਗ੍ਰੇਸ਼ਨ ਪਾਬੰਦੀਆਂ ਦੇ ਵਿਚਾਲੇ ਆਈ ਹੈ, ਜਿਸ ਵਿੱਚ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਲਈ ਸਕਰੀਨਿੰਗ ਦੀ ਪ੍ਰਕਿਰਿਆ ਹੋਰ ਸਖਤ ਕਰ ਦਿੱਤੀ ਗਈ ਹੈ।

ਮਈ ਦੇ ਅਖੀਰ ਵਿੱਚ, ਅਮਰੀਕੀ ਸਟੇਟ ਡਿਪਾਰਟਮੈਂਟ ਨੇ ਇੱਕ ਨਿਰਦੇਸ਼ ਜਾਰੀ ਕੀਤਾ ਜਿਸ ਵਿੱਚ F, M (ਵੋਕੇਸ਼ਨਲ) ਅਤੇ J (ਐਕਸਚੇਂਜ) ਵੀਜ਼ਾ ਚਾਹਵਾਨਾਂ ਲਈ ਨਵੇਂ ਇੰਟਰਵਿਊ ਸ਼ਡਿਊਲ ਕਰਨਾ ਰੋਕ ਦਿੱਤਾ ਗਿਆ। 27 ਮਈ ਤੋਂ 18 ਜੂਨ ਤੱਕ, ਸਾਰੀ ਦੁਨੀਆ ਵਿੱਚ ਇੰਟਰਵਿਊ ਮੁਅੱਤਲ ਕਰ ਦਿੱਤੇ ਗਏ, ਕਿਉਂਕਿ ਦੂਤਾਵਾਸਾਂ ਨੂੰ ਨਵੇਂ ਨਿਯਮ ਲਾਗੂ ਕਰਨ ਲਈ ਕਿਹਾ ਗਿਆ।

ਇਹ ਨਿਰਦੇਸ਼, ਜੋ ਕਿ ਵਿਦੇਸ਼ ਮੰਤਰੀ ਮਾਰਕੋ ਰੁਬਿਓ ਵੱਲੋਂ ਸਾਇਨ ਕੀਤਾ ਗਿਆ ਸੀ, ਇਸ ਵਿੱਚ ਪੰਜ ਸਾਲਾਂ ਦੀ ਸੋਸ਼ਲ ਮੀਡੀਆ ਸਕਰੀਨਿੰਗ ਲਾਜ਼ਮੀ ਬਣਾਈ ਗਈ। ਉਮੀਦਵਾਰਾਂ ਨੂੰ ਆਪਣੇ ਪਿਛਲੇ ਪੰਜ ਸਾਲਾਂ ਦੇ ਸੋਸ਼ਲ ਮੀਡੀਆ ਅਕਾਊਂਟ ਜਨਤਕ ਕਰਨ ਲਈ ਕਿਹਾ ਗਿਆ।

ਨਵੀਂ ਦਿੱਲੀ ਵਿੱਚ ਯੂਐਸ ਅੰਬੈਸੀ ਨੇ ਭਾਰਤੀ ਬਿਨੈਕਾਰਾਂ ਨੂੰ ਜਨਤਕ ਤੌਰ 'ਤੇ ਇਨ੍ਹਾਂ ਤਬਦੀਲੀਆਂ ਦੀ ਪਾਲਣਾ ਕਰਨ ਦੀ ਸਲਾਹ ਦਿੱਤੀ, ਜਿਸ ਕਾਰਨ ਦੇਰੀਆਂ ਅਤੇ ਬੈਕਲੌਗ ਨੂੰ ਲੈ ਕੇ ਚਿੰਤਾ ਉੱਠੀ ਹੈ।

ਇਸ ਦੇ ਨਤੀਜੇ ਵਜੋਂ ਘੱਟੋ-ਘੱਟ 32 ਅਮਰੀਕੀ ਰਾਜਾਂ ਵਿੱਚ ਵੀਜ਼ੇ ਰੱਦ ਕੀਤੇ ਗਏ ਹਨ। ਰਿਪੋਰਟਾਂ ਦਰਸਾਉਂਦੀਆਂ ਹਨ ਕਿ ਇਨ੍ਹਾਂ ਵਿੱਚੋਂ ਕੁਝ ਰੱਦ ਕੀਤੇ ਗਏ ਵੀਜ਼ਿਆਂ ਵਿੱਚ ਭਾਰਤੀ ਵਿਦਿਆਰਥੀ ਸ਼ਾਮਲ ਸਨ।

ਇਸ ਸਖਤ ਜਾਂਚ ਪ੍ਰਕਿਰਿਆ ਤੋਂ ਬਚਣ ਦੀ ਉਮੀਦ ਵਿੱਚ ਕਈ ਵਿਦਿਆਰਥੀਆਂ ਨੇ ਆਪਣੀ ਡਿਜੀਟਲ ਮੌਜੂਦਗੀ ਸਾਫ ਕਰਨੀ ਸ਼ੁਰੂ ਕਰ ਦਿੱਤੀ ਹੈ — ਪੁਰਾਣੀਆਂ ਪੋਸਟਾਂ ਹਟਾਉਣ, ਅਣਚਾਹੇ ਅਕਾਊਂਟ ਅਨਫੋਲੋ ਕਰਨ ਅਤੇ ਪਰਾਈਵੇਸੀ ਸੈਟਿੰਗਜ਼ ਨੂੰ ਵਧਾਉਣ ਵਰਗੇ ਕਦਮ ਚੁੱਕੇ ਜਾ ਰਹੇ ਹਨ।

ਗਿਰਾਵਟ ਦੇ ਬਾਵਜੂਦ, ਭਾਰਤੀ ਵਿਦਿਆਰਥੀ ਅਮਰੀਕਾ ਵਿੱਚ ਸਭ ਤੋਂ ਵੱਡਾ ਅੰਤਰਰਾਸ਼ਟਰੀ ਵਿਦਿਆਰਥੀ  à¨—ਰੁੱਪ ਬਣੇ ਰਹੇ। ਓਪਨ ਡੋਰਜ਼ 2024 ਦੇ ਅਨੁਸਾਰ, ਭਾਰਤੀ ਵਿਦਿਆਰਥੀਆਂ ਨੇ 2023–24 ਅਕਾਦਮਿਕ ਸਾਲ ਦੌਰਾਨ ਚੀਨੀ ਵਿਦਿਆਰਥੀਆਂ ਨੂੰ ਪਿੱਛੇ ਛੱਡ ਕੇ ਵਿਦੇਸ਼ੀ ਦਾਖ਼ਲਿਆਂ ਵਿੱਚ ਸਭ ਤੋਂ ਵੱਡਾ ਯੋਗਦਾਨ ਦਿੱਤਾ।

ਹਾਲਾਂਕਿ, 2024 ਵਿੱਚ ਕੁੱਲ ਰੁਝਾਨ ਘਟਣ ਵਾਲਾ ਰਿਹਾ ਹੈ। ਜਨਵਰੀ ਤੋਂ ਸਤੰਬਰ 2024 ਤੱਕ, ਭਾਰਤੀ ਵਿਦਿਆਰਥੀਆਂ ਨੂੰ 64,008 F-1 ਵੀਜ਼ੇ ਮਿਲੇ, ਜੋ ਕਿ 2023 ਦੇ 103,000 ਅਤੇ 2022 ਦੇ 93,181 ਨਾਲੋਂ ਕਾਫੀ ਘੱਟ ਹਨ।