ਏਅਰ ਇੰਡੀਆ ਨੇ ਉਡਾਣਾਂ ਰੱਦ ਕੀਤੀਆਂ / courtesy photo

ਇਜ਼ਰਾਈਲ-ਈਰਾਨ ਦੀ ਜੰਗ ਵਿਚਾਲੇ ਅਮਰੀਕਾ ਦੀ ਐਂਟਰੀ ਨੇ ਤਣਾਅ ਵਧਾ ਦਿੱਤਾ ਹੈ, ਜਿਸ ਤੋਂ ਬਾਅਦ ਈਰਾਨ-ਅਮਰੀਕਾ ਵੀ ਆਹਮੋ-ਸਾਹਮਣੇ ਆ ਗਏ ਹਨ। ਉੱਥੇ ਹੀ ਸੋਮਵਾਰ ਰਾਤ ਨੂੰ ਕਤਰ ਦੀ ਰਾਜਧਾਨੀ ਦੋਹਾ ਵਿੱਚ ਅਮਰੀਕਾ ਦੇ ਸਭ ਤੋਂ ਵੱਡੇ ਫੌਜੀ ਅੱਡੇ ਅਲ-ਉਦੀਦ ਏਅਰਬੇਸ 'ਤੇ ਈਰਾਨ ਨੇ ਮਿਜ਼ਾਈਲਾਂ ਦਾਗੀਆਂ। ਈਰਾਨ ਦੇ ਇਸ ਕਦਮ ਨੇ ਮਿਡਲ ਈਸਟ ਦੇ ਦੇਸ਼ਾਂ ਦੇ ਏਅਰਸਪੇਸ ਨੂੰ ਪ੍ਰਭਾਵਿਤ ਕੀਤਾ ਹੈ। ਉਥੇ ਹੀ ਮੱਧ ਪੂਰਬ ਵਿੱਚ ਵਧ ਰਹੀਆਂ ਤਣਾਅਪੂਰਨ ਸਥਿਤੀਆਂ ਦੇ ਚਲਦੇ, ਏਅਰ ਇੰਡੀਆ ਨੇ ਤੁਰੰਤ ਪ੍ਰਭਾਵ ਨਾਲ ਉੱਤਰੀ ਅਮਰੀਕਾ ਦੇ ਈਸਟ ਕੋਸਟ ਵੱਲ ਜਾਣ ਵਾਲੀਆਂ ਅਤੇ ਉਥੋਂ ਆ ਰਹੀਆਂ ਸਾਰੀਆਂ ਉਡਾਣਾਂ ਨੂੰ ਰੱਦ ਕਰ ਦਿੱਤਾ ਹੈ। ਏਅਰ ਇੰਡੀਆ ਦੇ ਇਕ ਬੁਲਾਰੇ ਨੇ ਕਿਹਾ, "ਮੱਧ ਪੂਰਬ ਵਿੱਚ ਵਿਕਸਿਤ ਹੋ ਰਹੀ ਸਥਿਤੀ ਦੇ ਮੱਦੇਨਜ਼ਰ, ਏਅਰ ਇੰਡੀਆ ਨੇ ਤੁਰੰਤ ਪ੍ਰਭਾਵ ਨਾਲ ਮੱਧ ਪੂਰਬ, ਉੱਤਰੀ ਅਮਰੀਕਾ ਦੇ ਈਸਟ ਕੋਸਟ ਅਤੇ ਯੂਰਪ ਵੱਲ ਜਾਂਣ ਵਾਲੀਆਂ ਅਤੇ ਉਥੋਂ ਆਉਣ ਵਾਲੀਆਂ ਸਾਰੀਆਂ ਉਡਾਣਾਂ ਨੂੰ ਅਗਲੇ ਹੁਕਮ ਤੱਕ ਰੱਦ ਕਰ ਦਿੱਤਾ ਹੈ।"  ਏਅਰ ਇੰਡੀਆ ਨੇ ਕਿਹਾ, "ਉੱਤਰੀ ਅਮਰੀਕਾ ਤੋਂ ਭਾਰਤ ਵੱਲ ਆ ਰਹੀਆਂ ਸਾਡੀਆਂ ਉਡਾਣਾਂ ਨੂੰ ਉਨ੍ਹਾਂ ਦੇ ਅਸਲੀ ਮੂਲ ਸਥਾਨਾਂ ਵੱਲ ਵਾਪਸ ਮੋੜਿਆ ਜਾ ਰਿਹਾ ਹੈ, ਅਤੇ ਕੁਝ ਹੋਰ ਉਡਾਣਾਂ ਨੂੰ ਭਾਰਤ ਵਾਪਸ ਲਿਆਇਆ ਜਾ ਰਿਹਾ ਹੈ ਜਾਂ ਕੁਝ ਉਡਾਣਾਂ ਨੂੰ ਬੰਦ ਕੀਤੇ ਗਏ ਹਵਾਈ ਰਸਤੇ ਤੋਂ ਦੂਰ ਰੀ-ਰੂਟ ਕੀਤਾ ਜਾ ਰਿਹਾ ਹੈ।"  

ਭਾਰਤ ਵਿੱਚ ਏਅਰ ਇੰਡੀਆ ਐਕਸਪ੍ਰੈਸ ਨੇ ਦੱਸਿਆ ਕਿ ਕੋਚੀਨ ਤੋਂ ਉਡਾਣ ਭਰਨ ਵਾਲੀ ਇੱਕ ਫਲਾਈਟ ਨੂੰ ਮਸਕਟ ਵੱਲ ਮੋੜਿਆ ਗਿਆ ਹੈ, ਜਦਕਿ ਦੋਹਾ ਜਾਣ ਵਾਲੀ ਅਗਲੀ ਉਡਾਣ ਰੱਦ ਕਰ ਦਿੱਤੀ ਗਈ ਹੈ। ਉੱਥੇ ਹੀ ਕਤਰ ਏਅਰਵੇਜ਼ ਦੀ ਉਡਾਣ ਵੀ ਦੇਰੀ ਨਾਲ ਪਹੁੰਚੇਗੀ। ਏਅਰ ਇੰਡੀਆ ਐਕਸਪ੍ਰੈਸ ਨੇ ਕਿਹਾ ਹੈ ਕਿ ਕਤਰ ਲਈ ਉਨ੍ਹਾਂ ਦੀ ਕੋਈ ਹੋਰ ਉਡਾਣ ਉਪਲਬਧ ਨਹੀਂ ਹੈ ਅਤੇ ਉਹ ਸਥਿਤੀ 'ਤੇ ਨਿਗਰਾਨੀ ਰੱਖ ਰਹੇ ਹਨ। ਇੰਡਿਗੋ ਨੇ ਵੀ ਚੇਤਾਵਨੀ ਜਾਰੀ ਕੀਤੀ ਹੈ ਕਿ ਇਸ ਖੇਤਰ ਵਿੱਚ ਉਡਾਣ ਭਰਨ ਵਾਲੀਆਂ ਉਨ੍ਹਾਂ ਦੀਆਂ ਕਈ ਉਡਾਣਾਂ ਵਿੱਚ ਦੇਰੀ ਜਾਂ ਡਾਇਵਰਜ਼ਨ ਹੋ ਸਕਦਾ ਹੈ। ਯਾਤਰੀਆਂ ਨੂੰ ਲਗਾਤਾਰ ਆਪਣੀ ਉਡਾਣ ਦੀ ਸਥਿਤੀ ਚੈੱਕ ਕਰਨ ਦੀ ਸਲਾਹ ਦਿੱਤੀ ਗਈ ਹੈ।

ਇਹ ਕਦਮ ਇਰਾਨ ਵੱਲੋਂ ਕਤਰ ਵਿੱਚ ਇੱਕ ਅਮਰੀਕੀ ਫੌਜੀ ਅੱਡੇ 'ਤੇ ਕੀਤਾ ਗਿਆ ਮਿਸਾਈਲ ਹਮਲਾ ਹੋਣ ਦੇ ਬਾਅਦ ਚੁੱਕਿਆ ਗਿਆ ਹੈ। ਇਸ ਦੇ ਨਤੀਜੇ ਵਜੋਂ ਗਲਫ ਖੇਤਰ 'ਚ ਹਵਾਈ ਖੇਤਰ ਬੰਦ ਹੋਣ ਕਾਰਨ ਕਤਰ ਏਅਰਵੇਜ਼ ਨੇ ਵੀ ਆਪਣੀਆਂ ਸੇਵਾਵਾਂ ਨੂੰ ਅਸਥਾਈ ਤੌਰ 'ਤੇ ਰੱਦ ਕਰ ਦਿੱਤਾ ਹੈ। ਏਅਰ ਇੰਡੀਆ ਦੇ ਇਸ ਫੈਸਲੇ ਦਾ ਅਸਰ ਨਾ ਸਿਰਫ਼ ਗਲਫ ਅਤੇ ਯੂਰਪ ਦੇ ਰਸਤੇ ਉੱਡਣ ਵਾਲੀਆਂ ਉਡਾਣਾਂ 'ਤੇ ਪੈਂਦਾ ਹੈ, ਬਲਕਿ ਇਹ ਭਾਰਤ ਅਤੇ ਉੱਤਰੀ ਅਮਰੀਕਾ ਦੇ ਮੁੱਖ ਸ਼ਹਿਰਾਂ ਵਿਚਕਾਰ ਯਾਤਰਾ ਕਰ ਰਹੇ ਯਾਤਰੀਆਂ 'ਤੇ ਵੀ ਸਿੱਧਾ ਪ੍ਰਭਾਵ ਪਾ ਰਿਹਾ ਹੈ। 

ਇਹ ਫੈਸਲਾ ਏਅਰ ਇੰਡੀਆ 'ਤੇ ਪਹਿਲਾਂ ਹੀ ਪਏ ਓਪਰੇਸ਼ਨਲ ਦਬਾਅ ਨੂੰ ਹੋਰ ਵਧਾ ਦਿੰਦਾ ਹੈ, ਕਿਉਂਕਿ ਹਾਲ ਹੀ ਵਿੱਚ ਏਅਰਲਾਈਨ ਨੇ Flight AI171 ਦੇ ਅਹਿਮਦਾਬਾਦ–ਲੰਡਨ ਰੂਟ 'ਤੇ ਹਾਦਸਾਗ੍ਰਸਤ ਹੋਣ ਤੋਂ ਬਾਅਦ ਆਪਣੀ ਅੰਤਰਰਾਸ਼ਟਰੀ ਸੇਵਾ ਵਿੱਚ ਕਮੀ ਕੀਤੀ ਸੀ। ਉਸ ਘਟਨਾ ਕਾਰਨ ਏਅਰ ਇੰਡੀਆ ਦੇ ਵੱਡੇ ਜਹਾਜ਼ਾਂ ਦੀ ਸਮੀਖਿਆ ਕੀਤੀ ਗਈ ਅਤੇ ਦਰਜਨਾਂ ਉਡਾਣਾਂ ਰੱਦ ਹੋਈਆਂ। ਜਦਕਿ ਸੇਵਾਵਾਂ ਮੁੜ ਸ਼ੁਰੂ ਕਰਨ ਲਈ ਕੋਈ ਸਮਾਂ-ਸੀਮਾ ਨਹੀਂ ਦਿੱਤੀ ਗਈ, ਏਅਰ ਇੰਡੀਆ ਨੇ ਕਿਹਾ ਹੈ ਕਿ ਉਹ ਸਥਿਤੀ 'ਤੇ ਗਹਿਰੀ ਨਿਗਰਾਨੀ ਰੱਖ ਰਹੀ ਹੈ ਅਤੇ ਸੁਰੱਖਿਅਤ ਹੋਣ 'ਤੇ ਉਡਾਣਾਂ ਮੁੜ ਚਲਾਈਆਂ ਜਾਣਗੀਆਂ।