ਰੀਵਾ ਗੁਪਤਾ ਆਪਣੀ ਮਾਂ ਰੋਮਾ ਗੁਪਤਾ ਦੇ ਨਾਲ / GoFundMe

2023 ਦੇ ਇੱਕ ਘਾਤਕ ਲੌਂਗ ਆਈਲੈਂਡ ਜਹਾਜ਼ ਹਾਦਸੇ ਤੋਂ ਬਚੀ ਇੱਕ ਔਰਤ ਨੇ ਸਥਾਨਕ ਫਲਾਈਟ ਸਕੂਲ 'ਤੇ ਮੁਕੱਦਮਾ ਕੀਤਾ ਹੈ, ਜਿਸ ਵਿੱਚ ਦੋਸ਼ ਲਗਾਇਆ ਗਿਆ ਹੈ ਕਿ ਜਿਸ ਦੁਖਾਂਤ ਨੇ ਉਸਦੀ ਮਾਂ ਅਤੇ ਇੱਕ ਨੌਜਵਾਨ ਪਾਇਲਟ ਦੀ ਜਾਨ ਲੈ ਲਈ, ਇਸਨੂੰ ਪੂਰੀ ਤਰ੍ਹਾਂ ਰੋਕਿਆ ਜਾ ਸਕਦਾ ਸੀ।

ਨਿਊਯਾਰਕ ਪੋਸਟ ਦੀ ਰਿਪੋਰਟ ਅਨੁਸਾਰ, 28 ਫਰਵਰੀ ਨੂੰ ਕਵੀਨਜ਼ ਸੁਪਰੀਮ ਕੋਰਟ ਵਿੱਚ ਦਾਇਰ ਕੀਤਾ ਗਿਆ ਮੁਕੱਦਮਾ, ਸਕੂਲ 'ਤੇ ਉਡਾਣ ਦੌਰਾਨ ਅੱਗ ਲੱਗਣ ਤੋਂ ਪਹਿਲਾਂ ਜਹਾਜ਼ ਦੀ ਸੁਰੱਖਿਆ ਬਾਰੇ ਕਈ ਚੇਤਾਵਨੀਆਂ ਨੂੰ ਨਜ਼ਰਅੰਦਾਜ਼ ਕਰਨ ਦਾ ਦੋਸ਼ ਲਗਾਉਂਦਾ ਹੈ।

33 ਸਾਲਾ ਰੀਵਾ ਗੁਪਤਾ ਇਸ ਹਾਦਸੇ ਵਿੱਚ ਗੰਭੀਰ ਰੂਪ ਵਿੱਚ ਸੜ ਗਈ ਸੀ ਅਤੇ ਉਸਨੂੰ ਸਥਾਈ ਅਪਾਹਜਤਾ ਦਾ ਸਾਹਮਣਾ ਕਰਨਾ ਪਿਆ। ਰੀਵਾ 2 ਬੀਏ ਪਾਇਲਟ ਐਨਵਾਈਸੀ ਅਤੇ ਇਸਦੀ ਮੂਲ ਕੰਪਨੀ, ਡੈਨੀ ਵਾਈਜ਼ਮੈਨ ਐਵੀਏਸ਼ਨ 'ਤੇ ਲਾਪਰਵਾਹੀ ਅਤੇ ਗਲਤੀ ਕਾਰਨ ਮੌਤ ਦਾ ਮੁਕੱਦਮਾ ਕਰ ਰਹੀ ਹੈ। ਮੁਕੱਦਮਾ ਨੈਸ਼ਨਲ ਟ੍ਰਾਂਸਪੋਰਟੇਸ਼ਨ ਸੇਫਟੀ ਬੋਰਡ (ਐਨਟੀਐਸਬੀ) ਦੀ ਇੱਕ ਸੰਘੀ ਕਰੈਸ਼ ਰਿਪੋਰਟ ਦਾ ਹਵਾਲਾ ਦਿੰਦਾ ਹੈ, ਜਿਸ ਅਨੁਸਾਰ ਬਿਜਲੀ ਦੇ ਸ਼ਾਰਟ ਕਾਰਨ ਉਡਾਣ ਦੌਰਾਨ ਅੱਗ ਲੱਗ ਗਈ ਸੀ।

ਪਾਈਪਰ ਪੀਏ-28 ਜਹਾਜ਼ 5 ਮਾਰਚ, 2023 ਨੂੰ ਫਾਰਮਿੰਗਡੇਲ ਦੇ ਰਿਪਬਲਿਕ ਹਵਾਈ ਅੱਡੇ 'ਤੇ ਪਹੁੰਚ ਦੌਰਾਨ ਹਾਦਸਾਗ੍ਰਸਤ ਹੋ ਗਿਆ।ਰੀਵਾ ਗੁਪਤਾ ਨੇ ਆਪਣੀ ਮਾਂ, ਰੋਮਾ ਗੁਪਤਾ ਦੇ ਨਾਲ ਸ਼ੁਰੂਆਤੀ ਉਡਾਣ ਸਿਖਲਾਈ ਲਈ ਇੱਕ ਗਰੁੱਪੋਨ ਖਰੀਦਿਆ ਸੀ, ਉਸ ਨੂੰ ਯਾਦ ਹੈ ਕਿ ਅੱਗ ਲੱਗਣ ਤੋਂ ਕੁਝ ਪਲ ਪਹਿਲਾਂ ਉਸਨੇ ਆਪਣੀ ਮਾਂ ਦੀ ਸੀਟ ਦੇ ਹੇਠੋਂ ਧੂੰਆਂ ਨਿਕਲਦਾ ਦੇਖਿਆ ਸੀ।

ਮੁਕੱਦਮੇ ‘ਚ ਦਾਅਵਾ ਕੀਤਾ ਗਿਆ ਹੈ ਕਿ ਜਾਂਚਕਰਤਾਵਾਂ ਦੇ ਅਨੁਸਾਰ ਹਾਦਸੇ ਤੋਂ ਪਹਿਲਾਂ ਦੇ ਮਹੀਨਿਆਂ ਵਿੱਚ ਉਸੇ ਜਹਾਜ਼ ‘ਚ ਦੋ ਵਾਰ ਕਾਕਪਿਟ ਵਿੱਚ ਧੂੰਆਂ ਦੇਖਿਆ ਗਿਆ ਸੀ, ਫਿਰ ਵੀ ਫਲਾਈਟ ਸਕੂਲ ਜ਼ਰੂਰੀ ਰੱਖ-ਰਖਾਅ ਕਰਨ ਵਿੱਚ ਅਸਫਲ ਰਿਹਾ। ਅਕਤੂਬਰ 2024 ਵਿੱਚ ਜਾਰੀ ਕੀਤੀ ਗਈ ਐੱਨਟੀਐੱਸਬੀ ਦੀ ਅੰਤਿਮ ਰਿਪੋਰਟ ਵਿੱਚ ਪਾਇਆ ਗਿਆ ਕਿ ਇੱਕ ਬਿਜਲੀ ਦੇ ਸ਼ਾਰਟ ਕਾਰਨ ਤੇਲ ਵਾਲੀ ਲਾਈਨ ਲੀਕ ਹੋ ਗਈ ਜਿਸ ਨਾਲ ਉਡਾਣ ਦੇ ਵਿਚਕਾਰ ਹੀ ਅੱਗ ਲੱਗ ਗਈ।

ਗੁਪਤਾ ਦੇ ਮੁਕੱਦਮੇ ਵਿੱਚ ਦੋਸ਼ ਲਗਾਇਆ ਗਿਆ ਹੈ ਕਿ ਆਪਰੇਟਰ ਡੈਨੀ ਵਾਈਜ਼ਮੈਨ ਅਤੇ ਉਸਦੇ ਫਲਾਈਟ ਸਕੂਲ ਨੇ ਸੁਰੱਖਿਆ ਨਾਲੋਂ ਮੁਨਾਫ਼ੇ ਨੂੰ ਤਰਜੀਹ ਦਿੱਤੀ।

"ਮੇਰੀ ਮਾਂ ਦੀ ਜਾਨ ਚਲੀ ਗਈ, ਅਤੇ ਪਾਇਲਟ ਦੀ ਜਾਨ ਚਲੀ ਗਈ, ਅਤੇ ਮੇਰੀ ਜ਼ਿੰਦਗੀ ਹਮੇਸ਼ਾ ਲਈ ਬਦਲ ਗਈ, ਕਿਉਂਕਿ ਕੋਈ ਪੈਸਾ ਕਮਾਉਣਾ ਚਾਹੁੰਦਾ ਸੀ," ਗੁਪਤਾ ਨੇ ਨਿਊਯਾਰਕ ਪੋਸਟ ਨੂੰ ਦੱਸਿਆ।

ਇੱਕ ਸਾਬਕਾ ਨਿਊਰੋਸਰਜਰੀ ਫਿਜ਼ੀਸ਼ੀਅਨ ਸਹਾਇਕ, ਗੁਪਤਾ ਦੇ ਸਰੀਰ ਦਾ ਅੱਧੇ ਤੋਂ ਵੱਧ ਹਿੱਸਾ ਸੜ ਗਿਆ ਸੀ ਅਤੇ ਕਈ ਅੰਗ ਕੱਟੇ ਗਏ। ਉਸਨੇ ਛੇ ਹਫ਼ਤੇ ਕੋਮਾ ਵਿੱਚ ਬਿਤਾਏ ਅਤੇ ਬਰਨ ਯੂਨਿਟ ਵਿੱਚ ਕਈ ਮਹੀਨੇ ਰਿਕਵਰੀ ਦਾ ਸਾਹਮਣਾ ਕੀਤਾ।

ਨੌਜਵਾਨ ਪਾਇਲਟ, 23 ਸਾਲਾ ਫੈਜ਼ੂਲ ਚੌਧਰੀ ਹਾਦਸੇ ਤੋਂ ਬਾਅਦ ਆਪਣੀਆਂ ਸੱਟਾਂ ਦੀ ਤਾਬ ਨਾ ਝੱਲਦਾ ਹੋਇਆ ਦਮ ਤੋੜ ਗਿਆ।

ਹੁਣ, ਗੁਪਤਾ ਇਨਸਾਫ਼ ਦੀ ਮੰਗ ਕਰ ਰਹੀ ਹੈ - ਨਾ ਸਿਰਫ਼ ਆਪਣੀ ਮਾਂ ਲਈ, ਸਗੋਂ ਇਹ ਯਕੀਨੀ ਬਣਾਉਣ ਲਈ ਕਿ ਕੋਈ ਹੋਰ ਪਰਿਵਾਰ ਇਸ ਤਰ੍ਹਾਂ ਦਾ ਦੁਖਾਂਤ ਨਾ ਸਹਿਣ ਕਰੇ।