ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ / facebook

ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਇਮੀਗ੍ਰੇਸ਼ਨ 'ਤੇ ਜਨਤਕ ਪ੍ਰਵਾਨਗੀ ਰੇਟਿੰਗ ਹਾਲ ਹੀ ਦੇ ਹਫ਼ਤਿਆਂ ਵਿੱਚ ਘਟ ਕੇ 41 ਪ੍ਰਤੀਸ਼ਤ ਰਹਿ ਗਈ ਹੈ, ਜੋ ਕਿ ਵ੍ਹਾਈਟ ਹਾਊਸ ਵਿੱਚ ਉਨ੍ਹਾਂ ਦੀ ਵਾਪਸੀ ਤੋਂ ਬਾਅਦ ਸਭ ਤੋਂ ਘੱਟ ਹੈ। 16 ਜੁਲਾਈ ਨੂੰ ਖਤਮ ਹੋਏ ਇੱਕ ਰਾਇਟਰਜ਼/ਇਪਸੋਸ ਪੋਲ ਵਿੱਚ ਪਾਇਆ ਗਿਆ ਕਿ ਅਮਰੀਕੀਆਂ ਨੇ ਸਖ਼ਤ ਕਾਰਵਾਈਆਂ ਨੂੰ ਲੈ ਕੇ ਨਕਾਰਾਤਮਕ ਨਜ਼ਰੀਆ ਅਪਣਾਇਆ ਹੈ।

ਰਿਪਬਲਿਕਨ ਰਾਸ਼ਟਰਪਤੀ ਟਰੰਪ ਨੇ ਦੇਸ਼ ਭਰ ਵਿੱਚ ਗੈਰਕਾਨੂੰਨੀ ਤਰੀਕੇ ਨਾਲ ਰਹਿ ਰਹੇ ਮਾਈਗ੍ਰੈਂਟਸ ਦੀ ਗ੍ਰਿਫਤਾਰੀ ਲਈ ਮੁਹਿੰਮ ਚਲਾਉਣ ਦਾ ਹੁਕਮ ਦਿੱਤਾ ਹੈ ਅਤੇ ਦੱਸਿਆ ਹੈ ਕਿ ਉਹ ਲੱਖਾਂ ਲੋਕਾਂ ਨੂੰ ਡਿਪੋਰਟ ਕਰਨਗੇ। ਉਨ੍ਹਾਂ ਨੇ ਖੇਤਾਂ ਵਰਗੀਆਂ ਥਾਵਾਂ 'ਤੇ ਛਾਪੇ ਮਾਰੇ ਹਨ, ਜੋ ਪਹਿਲੀ ਟਰਮ ਦੌਰਾਨ ਕਾਰਵਾਈ ਤੋਂ ਬਚੇ ਰਹੇ ਸਨ। ਇਹ ਛਾਪੇ ਅਕਸਰ ਨਾਕਬਪੋਸ਼ ਅਧਿਕਾਰੀਆਂ ਵੱਲੋਂ ਮਾਰੇ ਜਾਂਦੇ ਹਨ, ਜਿਸ ਕਾਰਨ ਦਰਜਨਾਂ ਮਾਮਲੇ ਅਦਾਲਤਾਂ 'ਚ ਪਹੁੰਚ ਚੁੱਕੇ ਹਨ।

ਸਿਰਫ਼ 28 ਫੀਸਦੀ ਲੋਕਾਂ ਨੇ ਇਸ ਗੱਲ ਨਾਲ ਸਹਿਮਤੀ ਜਤਾਈ ਕਿ "ਕੰਮ ਵਾਲੀਆਂ ਥਾਵਾਂ 'ਤੇ ਇਮੀਗ੍ਰੇਸ਼ਨ ਗ੍ਰਿਫਤਾਰੀਆਂ ਦੇਸ਼ ਲਈ ਚੰਗੀਆਂ ਹਨ," ਜਦਕਿ 54 ਫੀਸਦੀ ਨੇ ਇਸ ਨਾਲ ਅਸਹਿਮਤੀ ਜਤਾਈ। ਰਿਪਬਲਿਕਨ ਖਾਸ ਤੌਰ 'ਤੇ ਵੰਡੇ ਹੋਏ ਸਨ, 56 ਪ੍ਰਤੀਸ਼ਤ ਕੰਮ ਵਾਲੀਆਂ ਥਾਵਾਂ 'ਤੇ ਛਾਪੇਮਾਰੀ ਦੇ ਪੱਖ ਵਿੱਚ ਸਨ, 24 ਪ੍ਰਤੀਸ਼ਤ ਵਿਰੋਧ ਵਿੱਚ ਸਨ ਅਤੇ ਲਗਭਗ 20 ਪ੍ਰਤੀਸ਼ਤ ਨੇ ਕਿਹਾ ਕਿ ਉਨ੍ਹਾਂ ਨੂੰ ਪਤਾ ਨਹੀਂ। ਡੈਮੋਕ੍ਰੇਟਸ ਨੇ ਸਰਬਸੰਮਤੀ ਨਾਲ ਅਸਹਿਮਤੀ ਪ੍ਰਗਟਾਈ। ਕੈਲੀਫੋਰਨੀਆ ਵਿੱਚ ਇੱਕ ਹਾਲੀਆ ਇਮੀਗ੍ਰੇਸ਼ਨ ਛਾਪੇ ਦੌਰਾਨ ਇਕ ਖੇਤੀਬਾੜੀ ਮਜ਼ਦੂਰ ਦੀ ਮੌਤ ਹੋ ਗਈ ਅਤੇ ਸੈਂਕੜੇ ਲੋਕ ਗ੍ਰਿਫਤਾਰ ਕੀਤੇ ਗਏ।

ਰਿਪਬਲਿਕਨ ਵੀ ਇਸ ਗੱਲ 'ਤੇ ਵੰਡੇ ਹੋਏ ਸਨ ਜਦੋਂ ਉਨ੍ਹਾਂ ਨੂੰ ਪੁੱਛਿਆ ਗਿਆ ਕਿ ਕੀ ਉਹ ਇਸ ਬਿਆਨ ਨਾਲ ਸਹਿਮਤ ਹਨ ਕਿ ਇਮੀਗ੍ਰੈਂਟਾਂ ਦੀ ਗ੍ਰਿਫ਼ਤਾਰੀ ਫੌਜੀ ਕਾਰਵਾਈ ਵਾਂਗ ਕੀਤੀ ਜਾਣੀ ਚਾਹੀਦੀ ਹੈ। 60 ਫੀਸਦੀ ਨੇ ਸਹਿਮਤੀ ਦਿੱਤੀ ਤੇ 25 ਫੀਸਦੀ ਨੇ ਅਸਹਿਮਤੀ ਜਤਾਈ। ਕੁੱਲ ਮਿਲਾ ਕੇ, ਸਿਰਫ਼ ਇਕ ਤਿਹਾਈ ਅਮਰੀਕੀ ਇਸ ਵਿਚਾਰ ਨੂੰ ਸਮਰਥਨ ਦਿੰਦੇ ਹਨ ਅਤੇ ਸਿਰਫ 10 ਵਿੱਚੋਂ 1 ਡੈਮੋਕ੍ਰੈਟ ਇਸ ਨਾਲ ਸਹਿਮਤ ਹੈ।

ਇਸ ਤੋਂ ਇਲਾਵਾ ਜਦੋਂ ਪੁੱਛਿਆ ਗਿਆ ਕਿ ਕੀ ਇਮੀਗ੍ਰੇਸ਼ਨ ਅਧਿਕਾਰੀਆਂ ਨੂੰ ਛਾਪਿਆਂ ਦੌਰਾਨ ਮਾਸਕ ਪਹਿਨਣੇ ਚਾਹੀਦੇ ਹਨ। ਲਗਭਗ 70 ਪ੍ਰਤੀਸ਼ਤ ਰਿਪਬਲੀਕਨਾਂ ਨੇ ਕਿਹਾ ਕਿ ਉਨ੍ਹਾਂ ਨੂੰ ਪਹਿਨਣੇ ਚਾਹੀਦੇ ਹਨ ਜਦੋਂ ਕਿ ਡੈਮੋਕ੍ਰੇਟਸ ਨੇ ਕਿਹਾ ਕਿ ਉਨ੍ਹਾਂ ਨੂੰ ਨਹੀਂ ਪਹਿਨਣੇ ਚਾਹੀਦੇ।

ਵਿਦੇਸ਼ ਨੀਤੀ ਤੋਂ ਲੈ ਕੇ ਟੈਕਸਾਂ ਤੱਕ, ਵੱਖ-ਵੱਖ ਮੁੱਦਿਆਂ 'ਤੇ ਉਨ੍ਹਾਂ ਦੀ ਪ੍ਰਵਾਨਗੀ ਬਾਰੇ ਰਾਇਟਰਜ਼/ਇਪਸੌਸ ਦੇ ਸਰਵੇਖਣ ਵਿੱਚ, ਇਮੀਗ੍ਰੇਸ਼ਨ ਇਕਲੌਤਾ ਨੀਤੀ ਖੇਤਰ ਸੀ ਜਿੱਥੇ ਉਨ੍ਹਾਂ ਦੀ ਪ੍ਰਵਾਨਗੀ 50 ਪ੍ਰਤੀਸ਼ਤ ਤੱਕ ਪਹੁੰਚ ਗਈ। ਹਾਲਾਂਕਿ, ਉਸ ਤੋਂ ਬਾਅਦ ਇਹ ਦਰ ਘਟ ਗਈ ਹੈ ਅਤੇ ਤਾਜ਼ਾ ਸਰਵੇਖਣ ਵਿੱਚ 51 ਫੀਸਦੀ ਲੋਕਾਂ ਨੇ ਕਿਹਾ ਕਿ ਉਹ ਇਸ ਮਾਮਲੇ ਵਿੱਚ ਟਰੰਪ ਦੇ ਕੰਮ ਤੋਂ ਅਸੰਤੁਸ਼ਟ ਹਨ, ਜੋ ਕਿ ਉਸ ਦੇ ਹੱਕ 'ਚ ਰਹਿਣ ਵਾਲਿਆਂ ਨਾਲੋਂ 10 ਫੀਸਦੀ ਵੱਧ ਹਨ।

ਕਾਂਗਰਸ ਨੇ ਇਸ ਮਹੀਨੇ ਇੱਕ ਸਪੈਂਡਿੰਗ ਲਾਅ ਪਾਸ ਕੀਤਾ ਹੈ ਜੋ ਘੱਟੋ-ਘੱਟ 100,000 ਲੋਕਾਂ ਨੂੰ ਹਿਰਾਸਤ ਵਿੱਚ ਲੈਣ ਲਈ ਫੰਡ ਪ੍ਰਦਾਨ ਕਰਦਾ ਹੈ, ਜੋ ਕਿ ਜੂਨ ਦੇ ਅੰਤ ਤੱਕ ਹਿਰਾਸਤ ਵਿੱਚ ਰਹੇ 58,000 ਲੋਕਾਂ ਦੇ ਰਿਕਾਰਡ ਨਾਲੋਂ ਕਾਫੀ ਵੱਧ ਹੈ।

ਰਾਇਟਰਜ਼/ਇਪਸੋਸ ਦਾ ਇਹ ਸਰਵੇਖਣ ਆਨਲਾਈਨ ਅਤੇ ਰਾਸ਼ਟਰ ਪੱਧਰ 'ਤੇ ਕੀਤਾ ਗਿਆ ਸੀ, ਜਿਸ ਵਿੱਚ 1,027 ਅਮਰੀਕੀ ਬਾਲਗਾਂ ਦੀ ਰਾਏ ਲਈ ਗਈ।