Vivek Ramaswamy and Matt Huffman / Courtesy photo

ਓਹੀਓ ਦੇ ਰੀਪਬਲਿਕਨ ਗਵਰਨਰ ਉਮੀਦਵਾਰ ਵਿਵੇਕ ਰਾਮਾਸਵਾਮੀ ਨੇ ਅਧਿਕਾਰਤ ਤੌਰ 'ਤੇ ਓਹੀਓ ਹਾਊਸ ਦੇ ਸਪੀਕਰ ਮੈਟ ਹਫਮੈਨ ਦਾ ਸਮਰਥਨ ਪ੍ਰਾਪਤ ਕੀਤਾ, ਜਿਸ ਨਾਲ 2026 ਓਹੀਓ ਗਵਰਨਰ ਦੀ ਦੌੜ ਵਿੱਚ ਉਨ੍ਹਾਂ ਦੀ ਅਗਵਾਈ ਵਾਲੀ ਸਥਿਤੀ ਹੋਰ ਮਜ਼ਬੂਤ ​​ਹੋ ਗਈ ਹੈ।

ਹਫਮੈਨ, ਜੋ ਲੀਮਾ ਅਤੇ ਐਲਨ ਕਾਊਂਟੀ ਦੀ ਨੁਮਾਇੰਦਗੀ ਕਰਦੇ ਹਨ, ਨੇ ਕਿਹਾ ਕਿ ਉਨ੍ਹਾਂ ਨੇ ਕਈ ਮਹੀਨਿਆਂ ਤੱਕ ਰਾਮਾਸਵਾਮੀ ਦੇ ਓਹੀਓ ਲਈ ਦ੍ਰਿਸ਼ਟਿਕੋਣ ਨੂੰ ਧਿਆਨ ਨਾਲ ਸੁਣਨ ਤੋਂ ਬਾਅਦ ਇਹ ਫੈਸਲਾ ਲਿਆ। ਉਨ੍ਹਾਂ ਨੇ ਆਪਣੇ ਜਨਤਕ ਬਿਆਨ ਵਿੱਚ ਕਿਹਾ: “ਮੈਂ ਇਹ ਨਿਸ਼ਚਿਤ ਕੀਤਾ ਹੈ ਕਿ ਰਾਮਾਸਵਾਮੀ ਇੱਕ ਅਜਿਹੇ ਗਵਰਨਰ ਹੋਣਗੇ ਜੋ ਨਿਰਣਾਇਕ ਯੋਜਨਾਵਾਂ ਬਣਾਉਣਗੇ ਅਤੇ ਯਕੀਨੀ ਤੌਰ 'ਤੇ ਉਹਨਾਂ ਯੋਜਨਾਵਾਂ ਨੂੰ ਲਾਗੂ ਕਰਨ ਦਾ ਹੋਂਸਲਾ ਵੀ ਰੱਖਣਗੇ।”

ਆਪਣੇ ਵਿਧਾਨਕ ਤਜ਼ਰਬੇ ਨੂੰ ਯਾਦ ਕਰਦਿਆਂ, ਹਫਮੈਨ ਨੇ ਲੰਬੇ ਸਮੇਂ ਦੇ ਸੁਧਾਰਾਂ ਨੂੰ ਅੱਗੇ ਵਧਾਉਣ ਵਿੱਚ ਗਵਰਨਰਾਂ ਦੀ ਅਹਿਮ ਭੂਮਿਕਾ 'ਤੇ ਜ਼ੋਰ ਦਿੱਤਾ। ਉਨ੍ਹਾਂ ਨੇ 2012 ਦੀ ਸਕੂਲ ਚੋਇਸ ਕਾਨਫਰੰਸ ਨੂੰ ਯਾਦ ਕੀਤਾ, ਜੋ ਮਿਲਟਨ ਫਰੀਡਮੈਨ ਇੰਸਟੀਚਿਊਟ ਵੱਲੋਂ ਕਰਵਾਈ ਗਈ ਸੀ, ਜਿਸ ਵਿੱਚ ਇੰਡੀਆਨਾ ਦੇ ਸਾਬਕਾ ਸੂਬਾਈ ਸਿੱਖਿਆ ਡਾਇਰੈਕਟਰ ਟੋਨੀ ਬੈਨੇਟ ਨੇ ਕਿਹਾ ਸੀ ਕਿ ਸਥਾਈ ਨੀਤੀਆਂ ਵਿੱਚ ਬਦਲਾਅ ਸਿਰਫ਼ ਗਵਰਨਰਾਂ ਦੀ ਅਗਵਾਈ ਹੇਠ ਆ ਸਕਦੇ ਹਨ। ਹਫਮੈਨ ਨੇ ਕਿਹਾ ਕਿ ਓਹੀਓ ਜਨਰਲ ਅਸੈਂਬਲੀ ਵਿੱਚ ਉਨ੍ਹਾਂ ਦੇ 16 ਸਾਲਾਂ ਕਾਨੂੰਨੀ ਅਨੁਭਵ ਨੇ ਇਹ ਗੱਲ ਸਹੀ ਸਾਬਤ ਕੀਤੀ ਹੈ।

ਇਹ ਸਮਰਥਨ ਉਸ ਸਮੇਂ ਆਇਆ ਹੈ ਜਦੋਂ ਵਿਵੇਕ ਰਾਮਾਸਵਾਮੀ ਦੀ ਚੋਣ ਮੁਹਿੰਮ ਇਤਿਹਾਸਕ ਰਫ਼ਤਾਰ ਹਾਸਲ ਕਰ ਰਹੀ ਹੈ। 1 ਜੁਲਾਈ ਨੂੰ, ਉਨ੍ਹਾਂ ਦੀ ਟੀਮ ਨੇ ਐਲਾਨ ਕੀਤਾ ਕਿ ਫਰਵਰੀ ਦੇ ਅੰਤ ਵਿੱਚ ਮੁਹਿੰਮ ਦੀ ਸ਼ੁਰੂਆਤ ਤੋਂ ਲੈ ਕੇ ਹੁਣ ਤੱਕ ਉਹ $9.7 ਮਿਲੀਅਨ ਇਕੱਠਾ ਕਰ ਚੁੱਕੇ ਹਨ ਜੋ ਓਹੀਓ ਦੇ ਇਤਿਹਾਸ ਵਿੱਚ ਕਿਸੇ ਵੀ ਗਵਰਨਰ ਉਮੀਦਵਾਰ ਵੱਲੋਂ ਪਹਿਲੀ ਤਿਮਾਹੀ ਵਿੱਚ ਹੋਈ ਸਭ ਤੋਂ ਵੱਡੀ ਫੰਡਰੇਜ਼ਿੰਗ ਰਕਮ ਹੈ। ਮੁਹਿੰਮ ਨੇ ਇਹ ਵੀ ਜ਼ੋਰ ਦਿੱਤਾ ਕਿ ਇਸ ਰਕਮ ਵਿੱਚ ਰਾਮਾਸਵਾਮੀ ਦਾ ਕੋਈ ਨਿੱਜੀ ਯੋਗਦਾਨ ਸ਼ਾਮਲ ਨਹੀਂ ਹੈ।

ਰਾਮਾਸਵਾਮੀ, ਜੋ ਇਕ ਬਾਇਓਟੈਕ ਉਦਯੋਗਪਤੀ ਅਤੇ 2024 ਦੇ ਰੀਪਬਲਿਕਨ ਰਾਸ਼ਟਰਪਤੀ ਉਮੀਦਵਾਰ ਰਹਿ ਚੁੱਕੇ ਹਨ, ਨੂੰ ਕਈ ਮਹੱਤਵਪੂਰਨ ਰੀਪਬਲਿਕਨ ਆਗੂਆਂ ਵੱਲੋਂ ਸਮਰਥਨ ਮਿਲ ਚੁੱਕਾ ਹੈ, ਜਿਸ ਵਿੱਚ ਸਾਬਕਾ ਰਾਸ਼ਟਰਪਤੀ ਡੋਨਾਲਡ ਟਰੰਪ, ਯੂ.ਐਸ. ਸੈਨੇਟਰ ਜੇ.ਡੀ. ਵੈਂਸ, ਡੋਨਾਲਡ ਟਰੰਪ ਜੂਨੀਅਰ, ਓਹੀਓ ਰੀਪਬਲਿਕਨ ਪਾਰਟੀ ਦੀ ਸਟੇਟ ਸੈਂਟਰਲ ਕਮੇਟੀ ਅਤੇ ਰਾਜ ਦੇ ਕਾਂਗਰਸ ਡੈਲੀਗੇਸ਼ਨ ਦੇ ਸਾਰੇ ਰੀਪਬਲਿਕਨ ਮੈਂਬਰ ਸ਼ਾਮਲ ਹਨ। 

ਉਨ੍ਹਾਂ ਦੀ ਮੁਹਿੰਮ ਦਾ ਕਹਿਣਾ ਹੈ ਕਿ ਉਹ ਫਰਵਰੀ ਤੋਂ ਲੈ ਕੇ ਹੁਣ ਤੱਕ ਰਾਜ ਪੱਧਰ 'ਤੇ 50 ਤੋਂ ਵੱਧ ਇਵੈਂਟ ਕਰ ਚੁੱਕੀ ਹੈ, ਜਿਸ ਵਿੱਚ 36 ਫੰਡਰੇਜ਼ਰ ਵੀ ਸ਼ਾਮਲ ਹਨ, ਜੋ ਕਿ ਰੀਪਬਲਿਕਨ ਪਾਰਟੀ ਦੀ ਹਮਾਇਤ ਵਿੱਚ ਕਰਵਾਏ ਗਏ। ਇਨ੍ਹਾਂ ਰਾਹੀਂ ਉਨ੍ਹਾਂ ਨੇ ਹਜ਼ਾਰਾਂ ਡਾਲਰ ਇਕੱਠੇ ਕੀਤੇ ਹਨ ਜੋ ਡਾਊਨ-ਬੈਲੋਟ ਰੀਪਬਲਿਕਨ ਉਮੀਦਵਾਰਾਂ ਅਤੇ ਪਾਰਟੀ ਦੇ ਬੁਨਿਆਦੀ ਢਾਂਚੇ ਲਈ ਵਰਤੇ ਜਾਣਗੇ।

ਰਾਮਾਸਵਾਮੀ, ਰੀਪਬਲਿਕਨ ਗਵਰਨਰ ਮਾਈਕ ਡੀਵਾਈਨ, ਜੋ ਹੁਣ ਆਪਣੀ ਅੰਤਿਮ ਮਿਆਦ 'ਚ ਹਨ, ਦੀ ਜਗ੍ਹਾ ਲੈਣ ਲਈ ਚੋਣ ਲੜ ਰਹੇ ਹਨ। ਡੈਮੋਕ੍ਰੈਟਿਕ ਪੱਖ ਤੋਂ ਸਾਬਕਾ ਓਹੀਓ ਹੈਲਥ ਡਾਇਰੈਕਟਰ ਐਮੀ ਐਕਟਨ ਨੇ ਆਪਣੀ ਉਮੀਦਵਾਰੀ ਦਾ ਐਲਾਨ ਕਰ ਦਿੱਤਾ ਹੈ।

ਰੀਪਬਲਿਕਨ ਅਟਾਰਨੀ ਜਨਰਲ ਡੇਵ ਯੋਸਟ ਨੇ ਮਈ ਵਿੱਚ ਇਸ ਦੌੜ ਤੋਂ ਹਟਣ ਦਾ ਫੈਸਲਾ ਕੀਤਾ ਸੀ, ਥੋੜ੍ਹੇ ਸਮੇਂ ਬਾਅਦ ਜਦੋਂ ਓਹੀਓ ਰੀਪਬਲਿਕਨ ਪਾਰਟੀ ਨੇ ਅਧਿਕਾਰਕ ਤੌਰ 'ਤੇ ਰਾਮਾਸਵਾਮੀ ਦੀ ਹਮਾਇਤ ਕਰ ਦਿੱਤੀ ਸੀ।