ਯੂਕੇ ਦੇ ਰੱਖਿਆ ਮੰਤਰੀ ਵਰਨਨ ਕੋਕਰ / GOV.UK

ਯੂਕੇ-ਭਾਰਤ ਨੇ ਰੱਖਿਆ ਸਮਝੌਤਿਆਂ 'ਤੇ ਕੀਤੇ ਦਸਤਖ਼ਤ

ਇਹ ਸਮਝੌਤੇ ਭਾਰਤ ਦੀ 'ਆਤਮਨਿਰਭਰ ਭਾਰਤ' ਪਹਿਲਕਦਮੀ ਨੂੰ ਮਜ਼ਬੂਤ ਕਰਨਗੇ ਅਤੇ ਦੋਵਾਂ ਦੇਸ਼ਾਂ ਵਿਚਕਾਰ ਆਰਥਿਕ ਵਿਕਾਸ ਅਤੇ ਰਣਨੀਤਕ ਰੱਖਿਆ ਸਹਿਯੋਗ ਵਿੱਚ ਯੋਗਦਾਨ ਪਾਉਣਗੇ।

ਮਾਲਵਿਕਾ ਚੌਧਰੀ

ਯੂਨਾਈਟਿਡ ਕਿੰਗਡਮ (ਯੂਕੇ) ਨੇ 10 ਫ਼ਰਵਰੀ ਨੂੰ ਯੂਕੇ-ਭਾਰਤ ਰਣਨੀਤਕ ਭਾਈਵਾਲੀ ਵਿੱਚ ਰੱਖਿਆ ਨੂੰ ਜੋੜਦੇ ਹੋਏ ਰੱਖਿਆ ਭਾਈਵਾਲੀ-ਭਾਰਤ (ਡੀਪੀ-I) ਦੀ ਸ਼ੁਰੂਆਤ ਕੀਤੀ। ਦੋਵਾਂ ਦੇਸ਼ਾਂ ਨੇ ਬੰਗਲੁਰੂ ਦੇ ਯੇਲਹੰਕਾ ਏਅਰ ਫੋਰਸ ਸਟੇਸ਼ਨ 'ਤੇ ਦੋ-ਸਾਲ ਬਾਅਦ ਆਯੋਜਿਤ ਹੋਈ ਭਾਰਤ ਦੀ ਏਅਰੋਸਪੇਸ ਅਤੇ ਰੱਖਿਆ ਪ੍ਰਦਰਸ਼ਨੀ, ਏਅਰੋ ਇੰਡੀਆ 2025 ਵਿੱਚ ਵੀ ਮੁੱਖ ਰੱਖਿਆ ਸਮਝੌਤਿਆਂ 'ਤੇ ਦਸਤਖ਼ਤ ਕੀਤੇ।

ਯੂਕੇ ਦੇ ਰੱਖਿਆ ਮੰਤਰੀ ਵਰਨਨ ਕੋਕਰ ਨੇ ਇਸ ਸਮਾਗਮ ਵਿੱਚ ਯੂਕੇ-ਭਾਰਤ ਰੱਖਿਆ ਭਾਈਵਾਲੀ ਪਵੇਲੀਅਨ ਦਾ ਉਦਘਾਟਨ ਕੀਤਾ, ਜਿਸ ਨਾਲ ਦੁਵੱਲੇ ਰੱਖਿਆ ਸਹਿਯੋਗ ਨੂੰ ਵਧਾਉਣ ਲਈ ਯੂਕੇ ਦੇ ਰੱਖਿਆ ਮੰਤਰਾਲੇ ਦੇ ਅੰਦਰ ਇੱਕ ਪ੍ਰੋਗਰਾਮ ਦਫ਼ਤਰ ਦੀ ਸਥਾਪਨਾ ਕੀਤੀ ਗਈ।

ਹਵਾਈ ਰੱਖਿਆ ਵਿੱਚ ਅਗਲੀ ਪੀੜ੍ਹੀ ਦੇ ਹਥਿਆਰਾਂ 'ਤੇ ਸਹਿਯੋਗ ਵਧਾਉਣ ਦੇ ਹਿੱਸੇ ਵਜੋਂ, ਥੈਲਸ ਅਤੇ ਭਾਰਤ ਡਾਇਨਾਮਿਕਸ ਲਿਮਟਿਡ (ਬੀਡੀਐੱਲ) ਨੇ ਇਸ ਸਾਲ ਲਈ ਸ਼ੁਰੂਆਤੀ ਡਿਲੀਵਰੀ ਦੇ ਨਾਲ, ਹਾਈ ਵੇਲੋਸਿਟੀ ਮਿਜ਼ਾਈਲਾਂ (ਸਟਾਰ-ਸਟ੍ਰੀਕ) ਅਤੇ ਲਾਂਚਰਾਂ ਸਮੇਤ ਲੇਜ਼ਰ ਬੀਮ ਰਾਈਡਿੰਗ ਐੱਮਏਐੱਨਪੀਏਡੀ (ਐੱਲਬੀਆਰਐੱਮ) ਦੀ ਸਪਲਾਈ ਲਈ ਇੱਕ ਸਮਝੌਤੇ 'ਤੇ ਹਸਤਾਖਰ ਕੀਤੇ।

ਥੇਲਸ ਅਤੇ ਬੀਡੀਐੱਲ ਵਿਚਕਾਰ ਹੋਰ ਸਹਿਯੋਗ, ਲਾਈਟਵੇਟ ਮਲਟੀਰੋਲ ਮਿਜ਼ਾਈਲਾਂ (ਐੱਲਐੱਮਐੱਮ) ਦੇ ਉਤਪਾਦਨ 'ਤੇ ਕੇਂਦ੍ਰਤ ਰਹੇਗਾ ਜੋ ਕਿ ਭਾਰਤੀ ਉਦਯੋਗ ਨੂੰ ਥੇਲਸ ਦੀ ਗਲੋਬਲ ਸਪਲਾਈ ਚੇਨ ਵਿੱਚ ਜੋੜੇਗਾ। "ਭਾਰਤ ਆਪਣੀਆਂ ਰੱਖਿਆ ਸਮਰੱਥਾਵਾਂ ਵਿੱਚ ਆਤਮਨਿਰਭਰ ਬਣਨ ਦੀ ਆਪਣੀ ਯਾਤਰਾ ਵਿੱਚ ਮਹੱਤਵਪੂਰਨ ਕਦਮ ਚੁੱਕ ਰਿਹਾ ਹੈ। ਯੂਕੇ ਇਸ ਅਭਿਲਾਸ਼ਾ ਦਾ ਸਮਰਥਨ ਕਰਨ ਲਈ ਇੱਕ ਪਸੰਦੀਦਾ ਭਾਈਵਾਲ ਵਜੋਂ ਭਾਰਤ ਨਾਲ ਕੰਮ ਕਰਨ ਲਈ ਸੱਚਮੁੱਚ ਉਤਸੁਕ ਹੈ", ਭਾਰਤ ਵਿੱਚ ਬ੍ਰਿਟਿਸ਼ ਹਾਈ ਕਮਿਸ਼ਨਰ ਲਿੰਡੀ ਕੈਮਰਨ ਨੇ ਕਿਹਾ।

ਇਸ ਤੋਂ ਇਲਾਵਾ, ਦੋਵੇਂ ਦੇਸ਼ ਮੈਟਰਾ ਬੀਏਈ ਡਾਇਨਾਮਿਕਸ ਯੂਕੇ (ਐੱਮਬੀਡੀਏ ਯੂਕੇ) ਅਤੇ ਬੀਡੀਐੱਲ ਭਾਰਤ ਦੇ ਲੜਾਕੂ ਜਹਾਜ਼ਾਂ ਨੂੰ ਲੈਸ ਕਰਨ ਅਤੇ ਨਿਰਯਾਤ ਦਾ ਸਮਰਥਨ ਕਰਨ ਲਈ ਹੈਦਰਾਬਾਦ ਵਿੱਚ ਇੱਕ ਐਡਵਾਂਸਡ ਸ਼ਾਰਟ-ਰੇਂਜ ਏਅਰ-ਟੂ-ਏਅਰ ਮਿਜ਼ਾਈਲ (ਏਐੱਸਆਰਏਐੱਮ) ਅਸੈਂਬਲੀ ਅਤੇ ਟੈਸਟ ਸਹੂਲਤ ਵਿਕਸਤ ਕਰ ਰਹੇ ਹਨ।

ਸਮੁੰਦਰੀ ਖੇਤਰ ਵਿੱਚ ਯੂਕੇ ਅਤੇ ਭਾਰਤ ਨੇ ਭਾਰਤ ਦੇ ਅਗਲੀ ਪੀੜ੍ਹੀ ਦੇ ਲੈਂਡਿੰਗ ਪਲੇਟਫਾਰਮ ਡੌਕ (ਐੱਲਪੀਡੀ) ਫਲੀਟ ਲਈ ਇੱਕ ਏਕੀਕ੍ਰਿਤ ਫੁੱਲ ਇਲੈਕਟ੍ਰਿਕ ਪ੍ਰੋਪਲਸ਼ਨ (ਆਈਐੱਫਈਪੀ) ਸਿਸਟਮ ਵਿਕਸਤ ਕਰਨ ਲਈ ਇੱਕ ਪਰਪੋਸਲ ਤੇ ਹਸਤਾਖਰ ਕੀਤੇ। ਜੀਈ ਵਰਨੋਵਾ ਅਤੇ ਭਾਰਤ ਹੈਵੀ ਇਲੈਕਟ੍ਰੀਕਲਜ਼ ਲਿਮਟਿਡ (ਭੇਲ) ਭਾਰਤ ਦੀ ਪਹਿਲੀ ਸਮੁੰਦਰੀ ਜ਼ਮੀਨ-ਅਧਾਰਤ ਟੈਸਟਿੰਗ ਸਹੂਲਤ ਬਣਾਉਣ ਲਈ ਸਹਿਯੋਗ ਕਰ ਰਹੇ ਹਨ, ਜਿਸ ਦੇ 2030 ਤੱਕ ਕਾਰਜਸ਼ੀਲ ਹੋਣ ਦੀ ਉਮੀਦ ਹੈ।

"ਭਾਰਤ ਦਾ ਦੌਰਾ ਕਰਨਾ ਅਤੇ ਸਾਡੇ ਪਹਿਲਾਂ ਤੋਂ ਹੀ ਮਜ਼ਬੂਤ ਰੱਖਿਆ ਸਬੰਧਾਂ ਨੂੰ ਵਧਾਉਣਾ ਖੁਸ਼ੀ ਦੀ ਗੱਲ ਸੀ। ਸਾਡੀ ਰੱਖਿਆ ਭਾਈਵਾਲੀ ਅਤੇ ਯੂਕੇ-ਭਾਰਤ ਰੱਖਿਆ ਭਾਈਵਾਲੀ ਪਵੇਲੀਅਨ ਸਾਡੇ ਸਹਿਯੋਗ ਨੂੰ ਹੋਰ ਮਜ਼ਬੂਤ ਕਰਨ ਵਿੱਚ ਮਦਦ ਕਰਨਗੇ, ਦੋਵਾਂ ਦੇਸ਼ਾਂ ਵਿਚਕਾਰ ਆਰਥਿਕ ਵਿਕਾਸ ਅਤੇ ਭਾਰਤ ਦੀ ਆਤਮਨਿਰਭਰ ਇੱਛਾ ਦਾ ਸਮਰਥਨ ਕਰਨਗੇ," ਕੋਕਰ ਨੇ ਕਿਹਾ।