શંકર મહાદેવન અને ઝાકિર હુસૈનના ફ્યુઝન બેન્ડ 'શક્તિ' એ 'શ્રેષ્ઠ વૈશ્વિક સંગીત આલ્બમ' માટે ગ્રેમી એવોર્ડ જીત્યો / @RecordingAcad

ભારતીય સંગીતકારો શંકર મહાદેવન અને ઝાકિર હુસૈનના ફ્યુઝન બેન્ડ 'શક્તિ'એ 'બેસ્ટ ગ્લોબલ મ્યુઝિક આલ્બમ' માટે ગ્રેમી એવોર્ડ જીત્યો છે. આ એવોર્ડ તેમના આલ્બમ 'ધીસ મોમેન્ટ' માટે આપવામાં આવ્યો છે. ઇન્સ્ટાગ્રામ પર ગ્રેમી પરિવાર દ્વારા શેર કરવામાં આવેલ ફોટોમાં, મહાદેવન અને બેન્ડના અન્ય સભ્ય ગણેશ રાજગોપાલનને સ્ટેજ પર એવોર્ડ સ્વીકારતા જોઈ શકાય છે. ગ્રેમીએ પોસ્ટમાં લખ્યું, 'શ્રેષ્ઠ ગ્લોબલ મ્યુઝિક આલ્બમ વિનર - 'ધીસ મોમેન્ટ' પર શક્તિને અભિનંદન.

સંગીત ક્ષેત્રના સૌથી મોટા એવોર્ડ ગ્રેમી એવોર્ડનું આયોજન કરતી રેકોર્ડિંગ એકેડમીએ સોશિયલ મીડિયા પ્લેટફોર્મ 'X' પર આ જાહેરાત કરી હતી. શ્રેષ્ઠ વૈશ્વિક સંગીત આલ્બમ માટે ગ્રેમી એવોર્ડ મેળવનાર શક્તિનું આલ્બમ 'ધીસ મોમેન્ટ' જૂન 2023માં રિલીઝ થયું હતું. આ આલ્બમમાં સંગીત જૂથના સ્થાપક સભ્યો, ગિટારવાદક જ્હોન મેકલોફલિન સાથે ઝાકિર હુસૈન, શંકર મહાદેવન, વાયોલિનવાદક ગણેશ રાજગોપાલન અને પર્ક્યુશનિસ્ટ સેલ્વાગણેશ વિનાયક્રમ છે.

મહાદેવન, રાજગોપાલન અને સેલ્વાગણેશ એવોર્ડ સ્વીકારવા માટે સ્ટેજ પર આવ્યા હતા, જ્યારે મેકલોફલિન સમારોહમાં હાજર રહ્યા ન હતા અને અન્ય ગ્રેમી એવોર્ડ જીત્યા બાદ હુસૈન બેકસ્ટેજમાં હતા. મહાદેવને આ જીતનો શ્રેય તેની પત્ની સંગીતાને આપ્યો હતો. ભગવાન, પરિવાર, મિત્રો અને ભારતનો આભાર વ્યક્ત કર્યો હતો. રાજગોપાલને આ એવોર્ડ માટે રેકોર્ડિંગ એકેડમીનો આભાર માન્યો હતો.

ગયા વર્ષે 30 જૂને રિલીઝ થયેલા આલ્બમ 'ધીસ મોમેન્ટ'માં જ્હોન મેકલોફલિન (ગિટાર), ઝાકિર હુસૈન (તબલા), શંકર મહાદેવન (ગાયક), વી સેલ્વગણેશ (પર્ક્યુશનિસ્ટ) અને ગણેશ રાજગોપાલન (વાયોલિનવાદક) દ્વારા રચિત આઠ ગીતો છે. સાથે જ સુસાના બાકા, બોકાન્ટે, બર્ના બોય અને ડેવિડો જેવા અન્ય કલાકારો સાથે ગ્રેમી માટે નામાંકિત કરવામાં આવ્યા હતા.

દરમિયાન, ઝાકિર હુસૈને બેલા ફ્લેક અને એડગર મેયર સાથે 'પશ્તો'માં તેમના યોગદાન માટે 'બેસ્ટ ગ્લોબલ મ્યુઝિક પર્ફોર્મન્સ' ગ્રેમી પણ જીત્યો હતો, જેમાં રાકેશ ચૌરસિયા વાંસળી વાદક હતા. હુસૈને એક રાતમાં ત્રણ ગ્રેમી એવોર્ડ જીત્યા, જ્યારે ચોરસિયાને બે એવોર્ડ મળ્યા.

એવોર્ડ સમારોહમાં હાજરી આપનાર બે વખતના ગ્રેમી વિજેતા રિકી કેજે 2024ને ગ્રેમીમાં ભારતના વર્ષ તરીકે વર્ણવ્યું હતું. તેણે કહ્યું, 'વાહ... રાકેશ ચૌરસિયા, શંકર મહાદેવન, ગણેશ રાજગોપાલન, સેલ્વગણેશ વિનાયક્રમ અને ઉસ્તાદ ઝાકિર હુસૈન... ભારત ખરેખર એક ચમકતો સિતારો છે. રોમંચક! પાંચ ભારતીયોએ એક જ વર્ષમાં ગ્રેમી એવોર્ડ જીત્યા છે'.